Кабай кожоҥ (Колыбельная)

 

Баай-баай, балам, баай.

Урлу кайыҥ тазылы эдиҥ,

Укту-тöстÿниҥ тазылы эдиҥ,

Бала кайыҥ тазылы эдиҥ

Барлу уктуныҥ тазылы эдиҥ.

     Тойлой берген энеҥ келер,

     Тогус таар эт экелер.

     Аҥдай берген адаҥ келер,

     Бай куран бажын экелер.

     *   *   *

     Баай-баай, баай-баай,

Баай-баай, баай, балам,

Бай терекке чык, балам,

Бай терекке чык, балам,

Байдыҥ ла кызын ал, балам,        

     Байдыҥ ла кызын ал, балам,

         Кунан ла койды сой, балам,

         Кунан ла койды сой, балам,

         Куйругына той, балам,

         Куйругына той, балам,

         Баай-баай, баай-баай,

         Баай-баай, баай, балам.

          *   *   *

     Байдыҥ куштыҥ балазы,

Байдыҥ куштыҥ балазы,

Балам мÿркÿт текези,

Балам мÿркÿт текези,

Балам мениҥ jаш бала,

Балам мениҥ jаш бала,

Балам мениҥ эр болор,

Балам мениҥ эр болор.

*   *    *

Баай-баай, палам, баай,

Маай, маай!

Ман, мала, ман,

Маҥтап jорткон койонок!

Койоноктыҥ палазы,

Койныма суктан мееҥ палам!

Баай, баай, бай!

Кан-Кере куштыҥ палазы,

Калып jортон мееҥ палам!

Баай, баай, бай,

Тевер куштыҥ палазы

Тевин jортон меен палам!

Баай, баай, бай,

Ужар куштыҥ палазы,

Ужып jортон мееҥ палам!

Баай, баай, бай!

Баай, баай, бай!

Саҥыскан ужын шышкырап jит,

Сагышту балам, уктазаҥ,

Баай, баай, бай.